13 గంటల బానిసత్వానికి వ్యతిరేకంగా పోరాడుదాం!

13 గంటల బానిసత్వానికి వ్యతిరేకంగా పోరాడుదాం!
* తెలుగుదేశం, జనసేన, బీజేపీ,  ఆంధ్రప్రదేశ్ రాష్ట్ర డబుల్ ఇంజన్  ప్రభుత్వ కార్పొరేట్ సేవకు వ్యతిరేకంగా నిలుద్దాం!*

కొల్లిపర వెంకటేశ్వరరావు, కార్యదర్శి,
– సీపీఐ(ఎంఎల్) రెడ్ స్టార్, ఆంధ్రప్రదేశ్  కమిటీ.,

ఆంధ్రప్రదేశ్  రాష్ట్ర శాసనసభలో  శుక్రవారం  నాలుగు కార్మిక వ్యతిరేక బిల్లులను ఆమోదించింది. వాటికి చట్ట రూపం ఆమోదించింది. పరిశ్రమల్లో కార్యాలయాల్లో  13 గంటల పని విధానాన్ని చట్టబద్ధం చేసింది. రాత్రిపూట కూడా మహిళలు పనిచేయటానికి అనుకూలంగా చట్టాలను సవరించింది.  తెలుగుదేశం, జనసేన, భాజాపా, డబుల్ ఇంజన్ ప్రభుత్వం అని చెప్పుకునేటువంటి రాష్ట్ర ప్రభుత్వం  కేంద్ర ప్రభుత్వ లేబర్ కోడ్లను  నిస్సిగ్గుగా బలపరచడమే కాకుండా  దానికి అనుకూలంగా  రాష్ట్రంలో చట్ట సవరణలకు పూనుకున్నది. దీనికి వ్యతిరేకంగా ఆంధ్రప్రదేశ్  యావత్ శ్రామిక వర్గం ప్రజానీకం పోరాడవలసిన కర్తవ్యం మన మీద ఉన్నది.

శ్రామికవర్గానికి వ్యతిరేకంగా, పెట్టుబడిదారులకు అనుకూలంగా వ్యవహరించే బీజేపీ ప్రభుత్వం, తన అసలు రూపాన్ని మరోసారి బయటపెట్టింది. కార్మికుల హక్కులను అణచివేస్తూ, కార్పొరేట్ల లాభాపేక్షలకు సేవలు చేస్తూ ఈ ప్రభుత్వం మనుగడ సాగిస్తోంది. 13 గంటల పనిదినాన్ని చట్టబద్ధం చేయాలన్న దాని తాజా నిర్ణయం  అనేది కార్మిక ఉద్యమం సాధించిన చారిత్రక విజయాలపై ఒక క్రూరమైన దాడి. ఇది కార్మికులు, రైతులు, శ్రమజీవుల మీద బహిరంగ యుద్ధ ప్రకటన.

శతాబ్దానికి పైగా, ప్రపంచవ్యాప్తంగా కార్మికులు “పనికి ఎనిమిది గంటలు, విశ్రాంతికి ఎనిమిది గంటలు, వినోదానికి ఎనిమిది గంటలు” అనే నినాదంతో పోరాడారు. ప్రాణాలు అర్పించడం, అందుకొరకు రక్తత్యాగాల ద్వారా సాధించుకున్న ఈ డిమాండ్ కేవలం సమయానికి సంబంధించినది కాదు. అది గౌరవం, ఆరోగ్యం, బానిసలుగా కాకుండా మనుషులుగా జీవించే హక్కు కోసం,  శ్రామిక వర్గం చేసిన పోరాటం అది. 13 గంటల పనిదినాన్ని విధించడం ద్వారా, భారత కార్మికులను మళ్లీ వలసవాద దోపిడీ కాలంలోకి నెట్టాలని బీజేపీ ప్రయత్నిస్తోంది. ఆ రోజుల్లో కార్మికులను కేవలం లాభం కోసం ఉపయోగపడే పనిముట్లుగా మాత్రమే చూసేవారు. సర్వసంపదలకు మూలమైనటువంటి కార్మిక వర్గాన్ని వేతన బానిసలుగా చూశారు.

ఎక్కువ పని గంటలు “ఉత్పాదకతను పెంచుతాయి”, “అవకాశాలను సృష్టిస్తాయి” అని ప్రభుత్వం చేసే ప్రచారం పచ్చి మోసం. వాస్తవానికి, ఈ విధానం పెట్టుబడిదారులకు భారీ లాభాలను తెచ్చిపెడుతుంది. అదే సమయంలో నిరుద్యోగులకు ఉద్యోగాలను దూరం చేస్తుంది. ఉద్యోగ కల్పనకు బదులుగా, బీజేపీ ఉద్యోగాల దొంగతనానికి పాల్పడుతోంది – ఒకే కార్మికుడి చేత ఇద్దరి పని చేయిస్తూ, సరైన వేతనాలు ఇవ్వడం లేదు.

ఈ చర్య కార్మికుల రక్షణలను పూర్తిగా రద్దు చేయాలనే బీజేపీ పద్ధతిలో ఒక భాగం. మోడీ ప్రభుత్వం  29 కార్మిక చట్టాలను రద్దుచేసి కార్మిక వ్యతిరేక   నాలుగు  కార్మిక కోడ్‌లను ప్రవేశపెట్టింది. కార్మిక సంఘాల హక్కులను అడ్డుకుంది, కాంట్రాక్ట్ కార్మికులను ప్రోత్సహించింది, జాతీయ వనరులను కార్పొరేట్లకు అప్పగించింది. ఇప్పుడు, పని గంటలను పొడిగించడం ద్వారా, “అభివృద్ధి” అనే ముసుగులో వెట్టిచాకిరీని చట్టబద్ధం చేయాలని చూస్తోంది. పరిపాలన అనేది కార్పొరేట్ నిర్వహణగా మారిపోయింది. అంబానీలు, అదానీలు, బహుళజాతి గుత్తాధిపతులు విధానాలను నిర్దేశిస్తారు. కార్మికులు  పెట్టుబడిదారుల యొక్క లాభాల యంత్రంలో కేవలం ఒక పనిముట్టుగా మారిపోయారు.

13 గంటల పనిదినాలు కార్మికుల ఆరోగ్యాన్ని నాశనం చేస్తాయి. పని చేసే చోట ప్రమాదాలను పెంచుతాయి. మహిళలు, యువతను భరించలేని నిస్సహాయ స్థితిలోకి నెడతాయి. ఇప్పటికే ఇంటి పని భారాన్ని మోస్తున్న మహిళా కార్మికులు తీవ్రంగా నష్టపోతారు. యువత విద్య, విశ్రాంతి, సృజనాత్మకత కోసం అవసరమైన సమయాన్ని కోల్పోతారు. ఇది అభివృద్ధి కాదు – పెట్టుబడిదారీ లాభాల కోసం మానవ జీవితాలను నాశనం చేయడం  మాత్రమే.

ఈ నిర్ణయం  ఆర్ఎస్ఎస్ ఫాసిస్ట్ బీజేపీ నిజస్వరూపాన్ని బయటపెడుతోంది. అది పెద్ద ఆశ్రిత పెట్టుబడిదారులు,   కార్పొరేట్ భూస్వామ్య వర్గాల పక్ష పార్టీ. ప్రైవేటీకరణ, రైతుల పోరాటాలను అణచివేయడం, కార్మిక సంఘాలను అణచివేయడం వంటివాటిలో బీజేపీ ఎప్పుడూ దోపిడీ చేసేవారి పక్షానే నిలబడింది. 13 గంటల పనిదినం కార్మికులపై దాని యుద్ధంలో మరో ఆయుధం.

ఈ దారుణమైన నిర్ణయాన్ని సీపీఐ(ఎంఎల్) రెడ్ స్టార్, ఆంధ్రప్రదేశ్  కమిటీ తీవ్రంగా ఖండిస్తోంది. నిజమైన అభివృద్ధి అంటే తక్కువ పని గంటలు, ఎక్కువ వేతనాలు, సార్వత్రిక సామాజిక భద్రత, కార్మికులచే ఉత్పత్తిపై ప్రజాస్వామిక నియంత్రణ. ఈ దేశ సంపద కార్మికుల శ్రమతో సృష్టించబడింది, కార్పొరేట్ లాభాలకోసం కాదు. కార్మికుల హక్కులు, గౌరవం రాజీపడటానికి వీలు లేనివి.

ఈ శ్రమ దోపిడీ వ్యతిరేకంగా ఐక్యంగా నిలబడి, ప్రతిఘటించాలని కార్మికులు, రైతులు, విద్యార్థులు, అన్ని ప్రజాస్వామిక శక్తులను మేము పిలుపునిస్తున్నాము. ఎంతో కష్టంతో సాధించుకున్న 8 గంటల పనిదినం హక్కును మనం కాపాడుకోవాలి. వలసవాద బానిసత్వ కాలానికి తిరిగి వెళ్ళడానికి వ్యతిరేకంగా కార్మిక వర్గం  చేసే పోరాటంలో మనమంతా భాగస్వామ్యం కావాలి! కార్మిక వర్గం  అగ్ర భాగాన నిలబడాలి.

*కార్మిక వర్గ పోరాటం వర్ధిల్లాలి!
*13 గంటల పని దిన రద్దుకై పోరాడండి.
*8 గంటల పని దినాన్ని రక్షించుకుందాం!
*దుర్మార్గమైన లేబర్ కోడ్ లకు  వ్యతిరేకంగా పోరాడుదాం!

ఇట్లు ,
విప్లవాభివందనలతో,
కొల్లిపర వెంకటేశ్వరరావు, కార్యదర్శి 9392325652
vkollipara75@gmail.com
– సీపీఐ(ఎంఎల్) రెడ్ స్టార్, ఆంధ్రప్రదేశ్  కమిటీ.,
20-09-2025.